GRUPOS Y ARTISTES CONVIDAOS
N'ARBA
N'arba surde nel añu 1997 y ye un de los grupos folk asturianos más potentes de tolos tiempos, con una propuesta de reellaboración de la música tradicional, faciendo mezcla de folk acústicu con otros soníos de distintu orixe. Nel añu 2001 publicaron el so afamáu álbum “Inda yá ceu”.
Anque anguaño'l grupu nun ta n'activu, suelen xuntase pa tocar de manera puntual, n'ocasiones especiales, como ye'l casu del Festival de Bandes de Gaites “Villa de Candás”.
BORJA BARAGAÑO TRÍO
Formación compuesta por Borja Baragaño, Rubén Bada y Dolfu R. qu'ufierta música folk variada y calidable basada nos temes del últimu trabayu de Baragaño, “Onde yo me pueda dir”, qu'entemez temes asturianos, irlandeses, bretones, suecos y búlgaros, asina como composiciones propies y nel que collaboraron grandes músicos asturianos.
Más información: http://www.borjabaragano.com/es/
CAMILE LEVECQUE
Camile Levecque cursa los sos estudios de Grau Mediu en Francia, dientro de la clase de Isabelle Daups (fundadora del festival "Les rencontres de la harpe à Argenteuil" y del destacáu Trío Polycordes). Tres ello, gradúase nel "Musikene" (Euskadi), na clase de Frédérique Cambreling, llogrando'l títulu de Llicenciada en Música, cola mayor distinción na especialidá d' arpa. Tien, amás, el títulu de Concertista de la Musikhochschule de Würzburg (Alemaña), que llogró dientro de la clase d'arpa de Gisèle Herbert, una de les más grandes embaxadores de la escuela francesa d'arpa.
La pasión pol arpa llévala a recibir una formación de prestixu y a dar conciertos nes meyores sales europees: Auditoriu Nacional d' España, Théâtre des Champs Elysées, Cité de la Musique, Kursaal, Kölner Philharmonie, Stadthalle Bayreuth, KKL (Lucerna)… Collabora con orquestes como la Real Filarmónica de Liverpool, la ORCAM, la BOS, la Filarmónica d'Estrasburgo, y ye componente de delles agrupaciones de música de cámara coles qu'ufierta conciertos n' España, Alemaña y Francia. Ganadora del segundu premiu nel Concursu Internacional d'Arpa de Niza en 2010, Camille Levecque destaca tamién pola so collaboración con Mike Oldfield nel estrenu de Music of the Spheres.
Dende la so llegada a Madrid, la arpista francesa Camille Levecque trabaya pol desenvolvimientu y espansión de l'arpa n'España, col deséu de qu'esti instrumentu fascinante sía accesible pa toos. El so interés pola pedagoxía llévala a participar en dellos proyectos educativos en Francia y n' España entorno a la música, la espresión corporal y el teatru. L'últimu so espectáculu, “Arpicuento”, ta faciéndose en dellos centros culturales y educativos de la Comunidá de Madrid. Amás de ser asistente de coordinación del plan “Start and play” de Salvi- Mundi Música Garijo, enseña l'arpa y realiza talleres de descubrimientu de l'arpa pa toles edaes.
